دائروں کا سفر

ہم پچھلے 76 سالوں سے لکیریں لگا کر دائروں میں سفر کر رہے ہیں سپیڈیں بھی مارتے ہیں لیکن سفر ہے کہ کٹنے کا نام ہی نہیں لیتا وجہ یہ ہے کہ موت کے کنویں میں موٹر سائیکل چلانے والے ساری عمر کرتب ہی دکھاتے رہ جاتے ہیں ان کی نہ کوئی منزل ہوتی ہے نہ وہ کہیں پہنچ پاتے ہیں پاکستان بھی اپنی 76 سالہ زندگی میں اپنے دائرے کے اندر سفر کر رہا ہے ہر دوچار سال بعد ہم ایک نیا دائرہ کھینچتے ہیں اور ازسر نو اس میں سفر شروع کر دیتے ہیں بدقسمتی سے ہم آج تک ٹریک پر نہیں چڑھ سکے کسی نے اگر کوشش بھی کی ہے تو اگلے آنے والے نے محض اس بنیاد پر کہ اس کا آغاز جانے والے نے کیا ہے

اگر اس سفر کو میں نے آگے بڑھایا تو اس کا کریڈٹ اس کے کھاتے میں چلا جائے گا اسی خوف کے باعث وہ کثیر مالیت کے جاری منصوبے راستے میں چھوڑ کر ازسرنو نئے پراجیکٹ شروع کر کے وہاں اپنے ناموں کی تختیاں لگانا شروع کر دیتا ہے یہی وجہ ہے کہ ہر حکمران شارٹ ٹرم منصوبے بناکر دکھاوے کے کاموں میں مصروف رہتا ہے جس سے ملک نے ترقی کرناہوتی ہے وہ لانگ ٹرم منصوبے ہوتے ہیں ہمارے ہاں رواج بن گیا ہے کہ ہم سارے کام دکھاوے کے لیے کرتے ہیں آہستہ آہستہ ہم ملک کو ڈنگ ٹپاو طریقوں پر لے آئے ہیں اور آج صورتحال یہ ہے کہ ہمارا ہر حکمران کہتا ہے کسی نہ کسی طرح آج کا دن نکل جائے کل پتہ نہیں کون ہو گا جو ہو گا وہ جانے اس کا کام جانے اس سوچ نے ملک کا بیڑہ غرق کر کے رکھ دیا ہے

ہم نے ملک کو تجربہ گاہ بنا رکھا ہے ہر چوتھے دن ہم کوئی نہ کوئی نیا تجربہ کر رہے ہوتے ہیں ملک میں سسٹم مضبوط ہونے کی بجائے مافیاز مضبوط ہو چکے ہیں حقیقت یہ ہے کہ پاکستان ایک شتر بے مہار ریاست کا روپ دھار چکا ہے جس کا زور چلتا ہے وہ اپنے اصول ضابطوں کے مطابق ہانکنا شروع کر دیتا ہے ایک بار پھر ملک کو بحرانوں سے نکالنے کے لیے ایک نیا دائرہ کھینچا جا رہا ہے اورپوری توانائیاں لگا کر ایک سبق مٹا کر نیا سبق رٹایا جا رہا ہے نئے کرداروں کے ساتھ نئے انتخابات کا ڈول ڈالا جا رہا ہے لیکن ملین ڈالر سوال ہے کیا جس طرح کے انتخابات کروانے کا ہم فیصلہ کر چکے ہیں

اس سے معرض وجود میں آنے والی حکومت ملک کو مسائل سے نکالنے میں کامیاب ہو جائے گی کیا ان انتخابات کی روشنی میں استحکام آسکے گا کیا اکثریت کو اقلیت میں بدلنے سے معاملات حل ہو جائیں گے اگر نہیں ہو سکتے تو پھر یہ سارا کچھ کرنے کی کیا ضرورت ہے معاملات تو ایسے بھی چل رہے ہیں چلتے رہنے دیں لیکن جب بھی انتخابات کروائے جائیں بنیادی جمہوریت کی روح کے مطابق کروائے جائیں سب سیاسی جماعتوں کو ایک جیسا ماحول فراہم کیا جائے اور عوام پر اثر انداز ہونے بغیر عوام کو فیصلہ کرنے دیا جائے جس کو وہ آذادانہ ماحول میں منتخب کریں اسے حق حکمرانی دیا جائے اور پھر اسے کام کرنے کا موقع بھی دیا جائے

ہمیں دائروں کے سفر سے باہر نکلنے کے لیے مستقل طور پر کوئی ایک سسٹم اپنانا ہو گا دنیا کے مختلف ممالک میں مختلف سسٹم بڑی کامیابی کے ساتھ ڈلیور کر رہے ہیں کہیں بادشاہت ہے، کہیں صدارتی نظام حکومت ہے اور کہیں پارلیمانی نظام حکومت کے مختلف ماڈلز ہیں لیکن ان میں مداخلت نہیں جس کی وجہ سے ان ممالک کے عوام بھی مطمئن ہیں اور وہ ملک بھی ترقی کر رہے ہیں ہم بنگلہ دیش اور بھارت کا ہی موازانہ کر لیں تو وہ بھی دائروں سے نکل کر ٹریک پر چڑھ چکے ایک ہم ہیں کہ ہمیں دور دور تک کچھ سلجھائی نہیں دے رہا ہم اگر ماضی کی طرف نظر دوڑائیں تو قیام پاکستان کے ابتداء میں ہی حضرت قائد اعظم کی رحلت اور لیاقت علی خان کی شہادت کے بعد ہم نے ایسا کھلواڑ کیا کہ آج تک نہیں سنبھل پائے

آدھا ملک گنوا لیا لیکن اپنے آپ کو درست کرنے کی طرف ایک قدم نہیں بڑھایا ابتدا میں ہی اتنی حکومتیں تبدیل ہوئیں کہ جواہر لعل نہرو نے ہمیں طعنہ دے مارا کہ میں نے اتنی دھوتیاں تبدیل نہیں کیں جتنے پاکستان نے وزیراعظم تبدیل کر لیے ہیں 1988 سے لے کر آج تک کے واقعات تو بطور صحافی میں نے خود کور کیے ہیں کہ کس طرح بےنظیر بھٹو کو سمجھوتوں کے تحت اقتدار دیا گیا کس طرح اسے مفلوج کرکے کسی اور کو طاقت کے انجکشن لگائے گئے کس طرح 1990 میں بےنظیر کی حکومت ختم کر کے نواز شریف کو لایا گیا اور پھر نواز شریف کے ساتھ صدر کے اختلافات سے 1993 میں نواز شریف کی حکومت ختم کر کے بے نظیر کو لایا گیا اور 1997 میں بےنظیر کی حکومت ختم کر کے نواز شریف کو دو تہائی اکثریت دی گئی 1999 میں نواز شریف کی دو تہائی اکثریت کی حامل حکومت کو چلتا کیا گیا 2002 میں کس قدر زور لگا کر دونوں جماعتوں کو اقتدار سے دور رکھا گیا اور ق لیگ وجود میں لائی گئی پھر 2007 میں پیپلزپارٹی اور 2013 میں نواز شریف کو اقتدار دیا گیا پھر دونوں کے خلاف چور ڈاکو اور احتساب کا زور دار نعرہ لگا کر تیسرے کو لایا گیا اور اب وہ گلے کی ہڈی بن چکا ہے تو زور لگا کر دوبارہ نواز شریف کو قابل قبول بنایا جا رہا ہے آخر کب تک چوہے بلی کا یہ کھیل جاری رہے گا