اسرائیلی حکام کا ترک صدر پر یہودی مخالف ہونے کا الزام بے بنیاد ہے،ترک وزارتِ خارجہ کا اسرائیلی وزیرِ خارجہ کے بیان پر ردعمل
ترک وزارتِ خارجہ نے اسرائیلی وزیرِ خارجہ کے سفارتکاروں کو نکالنے کے بیان پر ردعمل دیا ہے۔ ترک وزارتِ خارجہ کی جانب سے کہا گیا ہے کہ اسرائیل غزہ میں نسلی کشی کر رہا ہے لیکن تنقید اور مذمت برداشت نہیں کرتا، اسرائیلی حکام کا ترک صدر پر یہودی مخالف ہونے کا الزام بے بنیاد ہے۔ ترک وزارتِ خارجہ کا کہنا ہے کہ ترکیہ یہودیوں کے لیے محفوظ ملک ہے، صدر اردوان پر بے بنیاد الزامات اور توہین کو مسترد کرتے ہیں۔ واضح رہے کہ غزہ میں جاری اسرائیل کے حملوں پر ترکیہ کے سخت موقف کے بعد اسرائیل نے ترکیہ سے اپنے سفارتی عملے کے کچھ افراد کو واپس بلا لیا تھا۔ غیر ملکی خبر ایجنسی کی رپورٹ کے مطابق اسرائیلی وزیرِ خارجہ ایلی کوہن کا کہنا تھا کہ ترکیہ سے آنے والے سنگین بیانات پر اپنے کچھ سفارتی عملے کو واپس بلایا ہے۔
