یادِ یاراں بھی تو نیزے کی انی ہوتی ہے
جاگتے سوتے جو سینے میں گڑی ہوتی ہے
کتنی روحیں ہیں جو یک جان ہوئے ملتی ہیں
میری تنہائی میں بھی بزم سجی ہوتی ہے
آنسو پیتا ہوں میں تلخابۂ شیریں کی طرح
غم کی برسات میں اشکوں کی جھڑی ہوتی ہے
رنج و غم سونپ گیا جاتے ہوئے ہجر کا دُکھ
اب اسی بوجھ سے یہ کمر جھکی ہوتی ہے
خواب سب توڑ دئیے میرے کھلونوں کی طرح
نیند سرہانے مرے موت کھڑی ہوتی ہے
ہڈیوں تک سے جدا ہوتا ہے اب ماس میاں
یہ بڑھاپا ہے یہاں خود سے ٹھنی ہوتی ہے
مفلسی توڑ کے رکھ دیتی ہے رشتے, ناطے
بھوک جب خون کے رشتوں سے بڑی ہوتی ہے
عمر کے ساتھ ڈھلا جاتا ہوں میں بھی اصغر
تابِ خورشید کے سنگ شام ڈھلی ہوتی ہے
